आश्रय फाऊंडेशनने घेतली फैजपूर शहरातील सुमारे ६० लोकांच्या रोजच्या जेवणाची जबाबदारी

विरोदा(प्रतिनिधी)- करोना संक्रमण थांबवण्यासाठी शासनाने संपूर्ण लाॅकडाऊन केलेले असल्याने शहरात असलेल्या गरीब, निराधार, निराश्रीत व दैनंदिन मजुरीवर अवलंबून असलेल्या जनतेचे अन्नाअभावी हाल होत आहेत. या पार्श्वभूमीवर फैजपूर प्रांत डाॅ.अजित थोरबोले यांनी डाॅ.भरत महाजन यांना केलेल्या आवाहनानुसार यावल व रावेर तालुक्यातील डाॅक्टरांच्या आश्रय फाऊंडेशनने फैजपूर शहरातील सुमारे ६० लोकांच्या रोजच्या जेवणाची जबाबदारी गेल्या तीन दिवसांपासून घेतली आहे. पंधरा दिवसांसाठी ही अन्नदान सेवा सकाळ संध्याकाळ अविरतपणे चालू राहील असे फाऊंडेशनचे अध्यक्ष डाॅ.कुंदन फेगडे, नगरसेवक यावल नगरपरिषद यांनी सांगितले. या लोकांनी अन्नासाठी शहरात विनाकारण फिरु नये व एकाच ठिकाणी राहून शासनाच्या लाॅकडाऊनचे त्यांच्याकडूनही पालन व्हावे हा व्यापक हेतू असल्याचे देखील त्यांनी सांगितले. आज सकाळी डाॅ.कुंदन फेगडे, डाॅ.पराग पाटील, डाॅ.विलास पाटील, डाॅ.प्रशांत जावळे यांनी या गरजूंकडे प्रत्यक्ष जाऊन जेवणाचे वाटप केले. यावेळी फाऊंडेशनच्या डाॅक्टरांनी यावेळी या सर्व लोकांना रोज जेवण मिळेल म्हणून आश्वस्त केले. फाऊंडेशच्या या उदात्त कामात रोज कल्पेश खत्री, पप्पू जाधव, उमेश वायकोळे, कन्हैय्या चौधरी, पंकज जयकर, मनिष माहूरकर, आशिष गुजराथी यांचे मोलाचे सहकार्य व सक्रिय सहभाग आहे. या उदात्त कामात कुणाला अथवा कुठल्या स्वयंसेवी संस्थेला स्वेच्छेने एका दिवसासाठी अन्नदान करायचे असल्यास किंवा अजून नवीन निराधारांची जबाबदारी घ्यायची असल्यास एक दिवस आधी डाॅ.भरत महाजन 9822838188 किंवा कल्पेश खत्री 9371846888 या क्रमांकावर संपर्क साधावा असे आवाहन फाऊंडेशनतर्फे करण्यात आले आहे.