जिल्ह्यात आतापर्यंत ४७ लाखांची मुख्यमंत्री सहाय्यता निधीस मदत
जळगाव, (जिमाका वृत्तसेवा) दि.२३- येथील सरकारी नोकरांची सहकारी सोसायटी म्हणजेच ग. स. सोसायटीतर्फे कोरोनाग्रस्तांसाठी ११ लाख रूपयांचा मदत निधी दिला असून याचा धनादेश आज राज्याचे पाणी पुरवठा व स्वच्छता मंत्री तथा जळगाव जिल्ह्याचे पालकमंत्री ना. गुलाबराव पाटील यांचेकडे सुपूर्द करण्यात आला.
ना. गुलाबराव पाटील यांनी मुख्यमंत्री सहाय्यता निधीसाठी वैयक्तीक पातळीपासून ते विविध व्यापारी, उद्योजक, सामाजिक संस्था, सहकारी संस्था आदींनी मदत करण्याचे आवाहन केले असून याला जिल्ह्यात चांगला प्रतिसाद मिळत आहे. त्यांच्या आवाहनाला प्रतिसाद देत जळगावच्या कृषी उत्पन्न बाजार समितीने ५ लाखांची मदत केली. यानंतर धरणगावच्या नगरपरिषदेनेही मुख्यमंत्री सहाय्यता निधीस मदत प्रदान केली. यानंतर आता सरकारी नोकरांची सहकारी सोसायटी अर्थात, ग.स. सोसायटीनेही ११ लाखांचा निधी दिलेला आहे.
ग.स. सोसायटीचे चेअरमन मनोज पाटील यांनी ना. गुलाबराव पाटील यांचेकडे ११ लाख रूपयांच्या मदतीचा धनादेश प्रदान केला. याप्रसंगी सोसायटीचे उपाध्यक्ष सुनील पाटील, संचालक तुकाराम बोरोले, विलास नेरकर, एन.एस. पाटील आदी मान्यवरांची उपस्थिती होती. ना. गुलाबराव पाटील यांनी ग.स. सोसायटीच्या दातृत्वाचे कौतुक केले.
दरम्यान, मुख्यमंत्री सहाय्यता निधीत जिल्ह्यातून आजवर ४७ लाख रूपयांची मदत देण्यात आलेली आहे. समाजाच्या सर्व स्तरांमधील नागरिकांनी यात आपापल्या परीने भर टाकावी. याच्या जोडीला सामाजिक संस्था, सहकारी संस्था, स्थानिक स्वराज्य संस्था आदींनीही सढळ हाताने मदत करण्याचे आवाहन ना. गुलाबराव पाटील यांनी केले आहे.
