आरोग्य
आपल्या शरीराचे कार्य सुरळीत चालण्यासाठी व रोगप्रतिकारक शक्ती वाढवण्यासाठी आपल्याला अनेक पोषक घटकांचे सेवन करणे गरजेचे असते, त्यामुळे या घटकांची कमतरता म्हणजेच अनेक रोग व अशक्तपणाचे निमंत्रक असते. अशाच घटकांपैकी एक म्हणजेच लोह.
शरीरात लोहाची कमतरता असल्यास हृदयाच्या ठोक्यांमध्ये चढ-उतार, थकवा, धाप लागणे, खाज सुटणे, डोकेदुखी, गिळण्यात त्रास, जीभ चिकट होणे, केसगळती व शारीरिक कमजोरी, शरीर पिवळे पडणे, नखांचा आकार बदलणे आणि धातूसारखी विचित्र चव लागणे इत्यादी समस्या उद्भवतात. यामुळे शरीरातील हिमोग्लोबिनची पातळी कमी कमी होत जाऊन शरीरातील उतींपर्यंत व्यवस्थित ऑक्सिजन पोहचत नाही. या समस्येचा विशेष त्रास महिलांना मासिक पाळीत रक्तस्राव झाल्यास होतो. गर्भवती महिलांनी बाळाच्या वाढीसाठी लोहाचे सेवन करणे फायदेशीर असते.
या समस्येवर उपाय म्हणून आपण आपल्या रोजच्या जेवणात राजमा, चणे, सोयाबीनचे पीठ, वाळलेले जर्दाळू, तृणधान्ये, डाळी, डाळिंब, लाल मांस व हिरव्या पालेभाज्यांचा समावेश करण्याबरोबरच शरीरात लोह शोषले जाण्याकरिता ‘सी जीवनसत्त्व’ असलेले पदार्थ खाणे गरजेचे आहे.
टीप – वरील लेख हा केवळ माहितीसाठी असून, यातील कोणत्याही पदार्थांचे सेवन डॉक्टरांच्या सल्ल्यानुसारच करावे.
