पाचोरा(प्रतिनिधी)- तालुक्यातील बांबरुड राणिचे येथील युवा आदर्श व प्रयोगशील शेतकरी मयुर अरुण वाघ यांना राजनंदिनी बहुउद्देशिय व गौरी उद्योग समुह, कुणबी मराठा वधुवर ग्रुप संस्थेतर्फे कृषिभूषण पुरस्कार 2020-21 जाहीर करण्यात आला आहे. मयूर वाघ यांनी विविध पिकांचे मोठ्या धाडसाने लागवड केली आहे. वाघ यांच्या शेतात आंतर पीक लागवड देखील केली जाते. ते नेहमीच नव नवीन पिक पद्धती घेत असतात. ते शेती सेंद्रिय पद्धतीने वेस्ट डी कपोजर चा वापर करुन करतात. शेतात पारंपारिक शेती न करता नवीन पिक पद्धती अवलंब करून मोसंबी बागेत पारंपारिक पद्धतीने मूग, उडीद, सोयाबीन ही पिकं घेतात व मसाल्याचे पदार्थ म्हणुन अद्रक व अरबी कंद हे पिके घेतात. त्यांनी शेतीत विविध नावीन्यपूर्ण यशस्वी प्रयोग केले आहेत. कृषि क्षेत्रातील उल्लेखनीय कार्याची दखल घेत राजनंदिनी संस्थेतर्फे त्यांना पुरस्कार जाहीर झाला. या पुरस्काराचे जळगावात लवकरच मान्यवरांच्या हस्ते वितरण होऊन मयूर अरुण वाघ यांना सन्मानित करण्यात येईल.
