जळगाव – शहर महानगरपालिकेच्या प्रभाग क्र.४ च्या नगरसेविका मिना धुडकू सपकाळे यांचे पती सामाजिक कार्यकर्ते तथा हमाल मापाडी संघटनेचे अध्यक्ष धुडकू सपकाळे यांचा आज दुपारी १.२५ वाजेच्या सुमारास शहरातील एमआयडीसी परिसरातील राका चौकात पूर्ववैमनस्यातून प्राणघातक हल्ला झाल्याची घटना घडली.
याबाबत वृत्त असे की, कृषि उत्पन्न बाजार समितीचे हमाल मापाडी संघटनेचे अध्यक्ष धुडकू सपकाळे यांचा काही महिन्यापूर्वी नितीन सोनवणे यांच्यासोबत माणसे पुरविण्यावरून वाद झाला असल्याचे समजते. आज दुपारी काशिनाथ हॉटेलच्या पुढे असलेल्या राका चौकात धुडकू सपकाळे, गजानन देशमुख व संजय चव्हाण हे एका टपरीवर गप्पा करीत उभे होते. यावेळी चारचाकीतून आलेल्या चौघांनी त्यांच्यावर तलवार व लाकडी दांड्याच्या सहाय्याने जोरदार हल्ला केला. दरम्यान नितीन सोनवणे, कॉमेश सपकाळे, मयुर सपकाळे व भुरा कोळी यांनी हा हल्ला केल्याची माहिती जखमींनी दिली. चौघांनी मिळून धुडकू सपकाळे यांच्यावर हल्ला केला सपकाळे गंभीर अवस्थेत असतांनाच त्यांना तत्काळ डॉ.भंगाळे रुग्णालयात दाखल करण्यात आले. शेवटचे वृत्त हाती आले तेव्हा पोलिस पथक रुग्णालयात चौकशीसाठी गेल्याचे समजते.
