संगमनेर – (शहर प्रतिनिधी) – येथील ज्येष्ठ पत्रकार सुखदेव गाडेकर यांना औषध उपचारासाठी महाराष्ट्र राज्य मराठी पत्रकार संघ,मुंबई शाखा संगमेनर यांच्या वतीने पंचवीस हजार रुपयांचा धनादेश महाराष्ट्र राज्य संघटनेचे राज्य सरचिटणीस विश्वासराव आरोटे यांच्या हस्ते देण्यात आला आहे. यावेळी विश्वासराव आरोटे यांनी सांगितले की, जेवढे संघटनेचे सभासद आहेत. त्या सर्व सभासदांचा एक महिन्याच्या आतमध्ये मेडीक्लेम पॉलिसी काढण्यात येणार असल्याचे त्यांनी सांगितले.
संगमनेर येथील शासकीय विश्रामगृहामध्ये शनिवार दि. १ फेब्रुवारी रोजी दुपारी महाराष्ट्र राज्य मराठी पत्रकार संघ,मुंबई शाखा संगमनेर यांच्या वतीने बैठकीचे आयोजन करण्यात आले होते. यावेळी ज्येष्ठ पत्रकार सुखदेव गाडेकर यांना काही दिवसांपुर्वी हृदयाच्या त्रासामुळे खासगी रुग्णालयामध्ये औषधोपचारासाठी दाखल करण्यात आले होते. त्यांची आर्थिक परिस्थिती अत्यंत हलाखीची असल्याने त्यांच्यावर आर्थिक व मानसिक ताण पडला. परंतु महाराष्ट्र राज्य मराठी पत्रकार संघाचे राज्य सरचिटणीस विश्वासराव आरोटे यांनी पत्रकार संघाच्या माध्यमातून सुखदेव गाडेकर यांना मदतीचा हात देऊन पंचवीस हजार रुपयांचा धनादेश दिला आहे.
यावेळी विश्वास आरोटे म्हणाले की, सध्या संगमनेरच्या संघटनेमध्ये वीस सभासदांची संख्या आहे. त्या सर्व सभासदांची मेडिक्लेम पॉलिसी एक महिन्याच्या आतमध्ये काढण्यात येणार आहे. त्याचबरोबर पत्रकारांना जी मदत लागेल ती सर्व मदत या पत्रकार संघाच्या माध्यमातून करण्यात येणार आहे. मात्र तो पत्रकार संघटनेचा सभासद असणे अत्यंत महत्त्वाचे आहे. सुरुवातीला काम करतांना खूप अडीअडचणी आल्या अनेकांनी नावेही ठेवली. पण तरीही आपण न डगमगता संघटनेसाठी काम करत राहिलो आहे. तुमच्यासारखे सर्व सभासद माझ्या पाठीशी भक्कमपणे उभे असल्यामुळेच मी आज राज्यभर फिरत आहे.
महाराष्ट्र राज्य मराठी पत्रकार संघाचे कार्य ३६ जिल्ह्यांमध्ये आहे. संघटनेचा एखादा पत्रकार आजारी पडल्यास त्यासाठी पत्रकार संघ मदत करत आहे. भविष्यात आपल्या सर्वांना एक दिलाने काम करायचे असल्याचेही शेवटी त्यांनी सांगितले. यावेळी ज्येष्ठ पत्रकार दत्ताभाऊ उणवने, महाराष्ट्र राज्य मराठी पत्रकार संघाचे जिल्हा उपाध्यक्ष अनिल राहाणे, कार्याध्यक्ष अनिल चौधरी, उत्तर महाराष्ट्र संपर्क प्रमुख सुभोषडोके, पत्रकार दत्ता गाडगे, दत्ता जाधव, भाऊसाहेब वाकचौरे, संगमनेर शाखेचे उपाध्यक्ष गोरक्षनाथ मदने, तालुका सचिव संजय गोपाळे, सदस्य राजू नरवडे, शेखर पानसरे, विकास वाव्हळ, बाबासाहेब कडू, संजय साबळे, भारत पडवळ, बाळासाहेब गडाख, अंकुश बुब आदी उपस्थित होते.
या कार्यक्रमाची प्रस्तावना तालुका सचिव संजय गोपाळे यांनी केली. तर आभार भारत पडवळ यांनी मानले.
