जळगाव – सामाजिक समता मंच रावेर व प्रकाशवाट मित्रपरिवार चोपडा यांच्या संयुक्त विद्यमाने महात्मा फुले व डॉ. बाबासाहेब आंबेडकर यांच्या संयुक्त जयंती निमित्ताने जिल्हाधिकारी कार्यालय जळगाव येथील अल्पबचत भवन सभागृहात माध्यमिक व महाविद्यालयीन विद्यार्थ्यांसाठी वक्तृत्व स्पर्धा संपन्न झाली . सदर कार्यक्रमाच्या अध्यक्षस्थानी महाराष्ट्र जनक्रांती मोर्चाचे प्रदेश अध्यक्ष मुकुंदभाऊ सपकाळे व उदघाटक रिपब्लिकन पार्टी ऑफ इंडिया चे जिल्हाध्यक्ष राजुभाऊ सूर्यवंशी हे होते .
विद्यार्थ्यांनी सर्वंकष परिवर्तनासाठी समाजात महात्मा फुले व डॉ. बाबासाहेब आंबेडकर यांच्या मौलिक ग्रंथांचे चिंतन करून समाजात विचार पेरण्याचे काम करून समतावादी समाज निर्मितीसाठी परिश्रम घ्यावे असे आपल्या अध्यक्षीय भाषणात मुकुंदभाऊ सपकाळे यांनी आवाहन केले . विचार मंचावर सामाजिक समता मंचचे अध्यक्ष राजू भाऊ सवर्णे , उमेश गाढे , अमोल कोल्हे , सरपंच सचिन बिऱ्हाडे , प्रा. संजय साळवे , दिलीप सपकाळे , वाय एस महाजन , प्रा विजय गोसावी , सिद्धार्थ तायडे , सुनीता तायडे , उद्योजक विशाल देवरे उपस्थित होते . या वक्तृत्व स्पर्धेमध्ये 60 विद्यार्थ्यांना सहभागी झाले . राष्ट्र निर्मितीसाठी युवकांची भूमिका या विषयावर अतिशय परखड मत मांडुन अश्विनी शिंदे यांनी 7000 रुपये रोख व प्रमाणपत्र स्मृती चिन्हासह प्रथम क्रमांकाचे बक्षीस मिळवले , तर सर्वांगीण क्षेत्रात महिलांची झेप याविषयावर जागतिक आणि भारतीय स्तरावरील महिलांचे क्रांतिकारक योगदान विशद करत नेहा शिंदे यांनी 5000 रूपये रोख प्रमाणपत्र व स्मृतिचिन्हासह द्वितीय क्रमांकाचे बक्षीस घेतले , महात्मा फुले यांचे कार्य आणि कर्तृत्व याविषयावर आधुनिक भारतातील शिक्षण व सामाजिक क्षेत्रातील कर्तृत्व नमूद करून हेमलता शिसोदे यांनी 3000 रुपये रोख प्रमाणपत्र व स्मृतिचिन्ह असे बक्षीस मिळवले . सायली महाजन , रोशन पाटिल , तपस्वी गवळी , भूमिकेत सोनवणे , जान्हवी चौधरी , गौरव पाटिल , सरोजिनी जैन यांना उत्तेजनार्थ 500 रुपये रोख प्रमाणपत्र व स्मृतीचिन्हाचे वितरण करण्यात आले .
सदर कार्यक्रमाचे प्रास्ताविक उमेश गाढे यांनी तर सुत्रसंचलन नगीन इंगळे व आभार प्रदर्शन भीमराव कोचुरे यांनी केले . वक्तृत्व स्पर्धेचे परीक्षण मा. सुरेश ठाकूर , प्रा. सतिष अहिरे यांनी केले . कार्यक्रमाच्या यशस्वीतेसाठी सामाजिक समता मंच , रावेर व प्रकाशवाट मित्रपरिवार , चोपडा यांच्यासह शुभांगी माळी , पूजा गुजराथी , घनश्याम माळी , शुभम रावते यांनी परिश्रम घेतले .
