कासोदा ता.एरंडोल- ( सागर शेलार )-एरंडोल येथे महाशिवराञी निमित्त महादेव मंदीर विश्वस्त मंडळातर्फे २४ फेब्रुवारी रोजी आयोजित कुस्ती सामन्यात १लाख ६१ हजार रूपये बक्षीसाची मानाची कुस्ती माऊली जमदाडे (भारत केसरी,कोल्हापुर) व मोहम्मद बोरानी यांच्यात होऊन जमदाडे या मल्लाने अवघ्या ४ मिनीटांत बोरानी ला आस्मान दाखवले.जमदाडे या पहीलवानाने दुहेरीपट लावत काही क्षणातच घिस्सा डावाने मोहम्मद बोरानी ला चितपट केले.
ही प्रेक्षणीय कुस्ती पाहुन कुस्ती शौकीनांचे डोळ्याचे पारणे फीटले. महादेव मंदीरा नजीक कुस्त्यांचे सामने आयोजित करण्यात आले.लहान-मोठ्या ६० ते ७० कुस्त्या झाल्या.भाजपाचे संघटनमंञी अँड. किशोर काळकर यांच्या हस्ते आखाडा पुजन करण्यात आला.लोकनियुक्त नगराध्यक्ष रमेश परदेशी यांचे हस्ते बजरंग बली च्या प्रतीमेची पुजा करण्यात आली.खासदार उन्मेश पाटील यांच्या हस्ते मानाची कुस्ती लावण्यात आली.या प्रसंगी उपनगराध्यक्ष अँड. नितीन महाजन , माजी नगराध्यक्ष राजेंद्र चौधरी, किशोर निंबाळकर, रविंद्र महाजन,रमेश महाजन,योगेश महाजन,जहीरोद्दीन शेख कासम,पारोळ्याचे माजी नगराध्यक्ष गोविंद शिरोळे, शालिकभाऊ गायकवाड आदी मान्यवर उपस्थित होते.
पांडुरंग महाले, गुलाब चौधरी, सतीष वाडकर धुळे, दिनेश गुजर यांनी पंच म्हणुन काम पाहीले.कुस्त्या पार पाडण्यासाठी बबलु पाटील, संजय महाजन, सतीष परदेशी यांचेसह ईतर कार्यकर्त्यांनी परीश्रम घेतले. यावेळी पोलिस निरीक्षक स्वप्निल उनवणे व त्यांच्या सहकार्यांनी चोख बंदोबस्त ठेवला.यावेळी धुळे, मालेगाव,दोंडाईचा,नंदुरबार व ईतर लांबच्या ठिकाणाहुन कुस्तीगीर आले होते.
