गुलाबराव पाटील विरुद्ध लकी टेलर यांचा ‘सामना रंगणार ‘
जळगाव-(प्रतिनिधी) – जळगाव ग्रामीणमधुन शिवसेनेचे बंडखोर उमेदवार लकी टेलर उर्फ लक्ष्मण गंगाराम पाटील यांनी आपली अपक्ष उमेदवारी जाहीर करून सहकार राज्यमंत्री ना. गुलाबराव पाटील यांच्याविरुद्ध शड्डू ठोकले असून या दोन्ही तुल्यबळ उमेदवारांमध्ये खरा सामना रंगणार असून लकी टेलर यांना फुटबॉल हे चिन्ह मिळाले असून जळगाव ग्रामीणमध्ये दोन्ही उमेदवारांच्या लढतीची जोरदार चर्चा सुरु झाली आहे . कृषि उत्पन्न बाजार समितीच्या माध्यमातून लकी टेलर यांनी जळगाव तालुक्यासह धरणगाव तालुक्यातही आपली स्वच्छ प्रतिमा निर्माण केली आहे. त्यांचा प्रभाव पाहता त्यांना जनतेकडून उत्स्फूर्त प्रतिसाद मिळत असून विशेषतः तरुणाई त्यांच्या पाठीशी असल्याने हि त्यांची बलस्थाने आहेत .
गेल्या अनेक दिवसांपासून लकी टेलर यांनी मतदार संघ पिंजून काढत लोकांच्या अडचणी समस्यां जाणून घेत आमदारकी निवडून आल्यास मतदार संघाचा विकास करून कायापालट करून दाखविण्याचा विडा उचलला आहे. बाजार समितीचा अवघ्या १६ महिन्यात विकास करून दाखविला होता . त्याच धर्तीवर हाच पॅटर्न निवडून आल्यानंतर राबविणार असल्याचे लकी टेलर यांनी सांगितले . सहकार राज्यमंत्री गुलाबराव पाटील यांच्यासमोर मोठे आव्हान निर्माण केले असून त्यांचा विजय निश्चित होणार अशी त्यांच्या समर्थकांना आशा आहे.
