उस्मानाबाद, दि. 8 (जिमाका) :- महाराष्ट्र शासनाने कोविड-19 या विषाणूचा प्रादुर्भाव रोखण्यासाठी संपूर्ण राज्यात लॉकडाऊनचा कालावधी दिनांक 17 मे 2020 पर्यंत वाढविला आहे. या लॉकडाऊनच्या कालावधीत करावयाच्या कार्यवाहीबाबत सविस्तर मार्गदर्शक सूचना दिलेल्या आहेत. त्यातील मुद्दा क्रमांक 9 (iii) नुसार ग्रीन झोनमध्ये बस डेपो 50 टक्के इतक्या क्षमतेने सुरू करण्यास परवानगी देण्यात आलेली आहे.
विभाग नियंत्रक, राज्य परिवहरन, उस्मानाबाद यांनी महाराष्ट्र राज्य मार्ग परिवहन महामंडळ उस्मानाबाद विभागातील विभागीय कार्यशाळा व आगार कार्यशाळा येथील कामकाज सकाळी 8.30 ते 17.30 या वेळेमध्ये सुरु करण्यासाठी परवानगी मिळणे बाबत विनंती केली आहे.
त्यामुळे जिल्हाधिकारी तथा जिल्हा आपत्ती व्यवस्थापन प्राधिकरणच्या अध्यक्षा दीपा मुधोळ-मुंडे यांना प्राप्त अधिकारांनुसार कोरोना विषाणू (COVID-19) चा प्रादुर्भाव रोखण्यासाठी लॉकडाऊनच्या कालावधीत दि. 17 मे, 2020 पर्यंत महाराष्ट्र राज्य मार्ग परिवहन महामंडळ
उस्मानाबाद विभागातील विभागीय कार्यशाळा व आगार कार्यशाळा येथील कामकाज सकाळी 8.30 ते 17.30 या वेळेमध्ये सुरु करण्यासाठी खालील अटी व शर्तीच्या आधीन राहून परवानगी दिली आहे.
महाराष्ट्र शासनाच्या आदेशातील मुद्दा क्रमांक 9 (iii) नुसार विभागीय कार्यशाळा व आगार कार्यशाळा 50 टक्के क्षमतेने सुरु करता येतील. कोविड-19 चा प्रादुर्भाव रोखण्यासाठी आरोग्य विभागाने तयार केलेली प्रामाणिक कार्यपद्धती (SOP) चे पालन करणे बंधनकारक राहील. कर्मचाऱ्यांची बायोमेट्रिक उपस्थिती न नोंदविता हजेरीपटावर उपस्थिती घेण्यात यावी. विभागीय कार्यशाळा व आगार कार्यशाळा येथे वारंवार स्वच्छता व निर्जंतुकीकरण करण्यात यावे. तसेच आरोग्य विभागाने ठरवून दिलेल्या निकषांनुसार सामाजिक अंतराचे पालन करण्यात यावे. उपस्थित कर्मचाऱ्यांनी वैयक्तिक स्वच्छता राखणे, मास्क, ग्लोव्हज, गॉगल्स, सॅनिटायझर यांचा वापर करणे बंधनकारक असेल. कर्मचाऱ्यांना त्यांचे हाताने त्यांचे नाक, तोंड व डोळ्यांना स्पर्ध न करण्याबाबत सूचना करावे. शासनाकडून तसेच आरोग्य विभागाकडून वेळोवेळी देण्यात येणाऱ्या सूचनांचे पालन करणे बंधनकारक राहील. तसेच महाव्यवस्थापक, महाराष्ट्र राज्य मार्ग परिवहन महामंडळ, यंत्र अभियांत्रिकी खाते, मुंबई यांनी दिलेल्या सूचनांचे तंतोतंत पालन करण्यात यावे.
या आदेशाची अंमलबजावणी आदेशाच्या दिनांकापासून तात्काळ लागू करण्यात येत आहे.