नवी दिल्ली-केंद्रातील मोदी सरकारने रिझर्व्ह बँक ऑफ इंडियाकडून १.७६ लाख कोटी रुपये घेतल्यानंतर काँग्रेसने केंद्र सरकारवर सडकून टीका केली आहे. देशात आर्थिक मंदी आली असून केंद्रातील मोदी सरकार देशाला दिवाळखोरीत ढकलत आहे, असा गंभीर आरोप काँग्रेस नेते आनंद शर्मा यांनी आज एका पत्रकार परिषदेत केला. पंतप्रधान आणि अर्थमंत्र्यांनी तात्काळ श्वेतपत्रिका काढून सध्याची परिस्थिती देशाला सांगावी, असेही ते यावेळी म्हणाले.
केंद्रात पुन्हा मोदी सरकार आल्यापासून देशाची अर्थव्यवस्था डबघाईला आली आहे. आनंद शर्मा यांनी यावेळी विमल जालान समितीच्या शिफारसींवरही प्रश्न उपस्थित केले. याआधी कधीही अशी परिस्थिती उद्धभवली नव्हती. परंतु, आरबीआयने पूर्णपणे सरपल्स सरकाला ट्रान्सफर करण्याचा निर्णय घेतला आहे. ही फारच भीतीदायक आर्थिक स्थितीचा पुरावा आहे. ज्या समित्या बनवल्या आहेत. त्यांच्या शिफारसींमध्ये स्पष्टपणे म्हटलेय की, ८ टक्क्यांपेक्षा कमी सीआरबी झाली नाही पाहिजे. पण, आता सेंट्रल बँकेसाठी सीआरबी ५.५ टक्क्यांवर आणला आहे. हे फारच भयानक आहे. जर, उद्या जागतिक मंदी उद्भवली तर अर्थव्यवस्था वाचवण्यासाठी आरबीआयकडे कोणताही पर्याय उपलब्ध राहणार नाही, असेही शर्मा म्हणाले.
जगातील कोणत्याही देशांची आर्थिक परिस्थिती खूप बिघडली तरच त्या देशाच्या सरकारला सेंट्रल बँकेतील राखीव निधीचे पैसे दिले जातात. भारत सरकारने रिझर्व्ह बँकेकडून पैसे घेतले याचाच अर्थ देशातील आर्थिक परिस्थिती सामान्य नाही, असाच होतो. अर्जेंटिनाने सरप्लस सरकारला दिला त्यानंतर तेथील आर्थिक परिस्थिती कशी बिघडली होती, याचा दाखलाही शर्मा यांनी दिला. आपल्या देशातील सध्या जी परिस्थिती बिघडली आहे. ती काही एका दिवसात बिघडली नाही. केंद्रात मोदी यांचे सरकार आल्यानंतर ही परिस्थिती उद्भवल्याचेही शर्मा यांनी म्हटले आहे.
