लोहारा, ता. पाचोरा (प्रतिनिधी : ईश्वर खरे) – येथून जवळच असलेल्या कासमपुरा येथील श्री राम-सीता माध्यमिक व उच्च माध्यमिक विद्यालयात विद्यार्थ्यांसाठी सायबर सुरक्षा व सामाजिक जनजागृतीपर मार्गदर्शन कार्यक्रम उत्साहात संपन्न झाला. कार्यक्रमात पोलीस उपविभागीय अधिकारी बापू रोहम तसेच पिंपळगाव हरेश्वर पोलीस ठाण्याच्या सहाय्यक पोलीस निरीक्षक श्रीमती कल्याणी वर्मा यांनी विद्यार्थ्यांना सायबर सुरक्षेसह विविध सामाजिक, शैक्षणिक व वैयक्तिक विकासाच्या विषयांवर मोलाचे मार्गदर्शन केले.
विद्यार्थ्यांशी संवाद साधताना अधिकाऱ्यांनी मोबाईलचा योग्य व मर्यादित वापर, वाढते सायबर गुन्हे, ऑनलाइन फसवणुकीपासून बचाव, महिला सुरक्षा, व्यसनमुक्तीचे महत्त्व, स्पर्धा परीक्षांची तयारी तसेच नियमित व्यायामाचे फायदे याविषयी सविस्तर माहिती दिली. सोशल मीडियाचा वापर जबाबदारीने करावा, अनोळखी व्यक्तींना वैयक्तिक माहिती देऊ नये, संशयास्पद लिंक किंवा संदेशांपासून सावध राहावे, असे आवाहनही त्यांनी विद्यार्थ्यांना केले.
यावेळी विद्यार्थ्यांना शिस्त, प्रामाणिकपणा, आत्मविश्वास, वेळेचे नियोजन आणि सकारात्मक विचारसरणी ही यशस्वी आयुष्याची गुरुकिल्ली असल्याचे सांगण्यात आले. शिक्षणाबरोबरच उत्तम आरोग्य, नियमित व्यायाम आणि सामाजिक जबाबदारीची जाणीव जोपासण्याचे महत्त्वही अधिकाऱ्यांनी अधोरेखित केले. कार्यक्रमादरम्यान विद्यार्थ्यांनी विविध विषयांवर प्रश्न विचारत अधिकाऱ्यांशी मुक्त संवाद साधला.
कार्यक्रमास सौ. मंगलाबाई परदेशी (पोलीस पाटील) तसेच नितीन परदेशी (माजी सरपंच) यांची प्रमुख उपस्थिती लाभली.
कार्यक्रमाच्या प्रारंभी विद्यालयाचे मुख्याध्यापक किरण चौधरी यांच्या हस्ते प्रमुख पाहुण्यांचे स्वागत करण्यात आले. यावेळी आनंद ढोणी, उपशिक्षक सतीश राजपूत, शिक्षिका श्रीमती सीमा पाटील व श्रीमती वर्षा भालेराव यांनी मान्यवरांचा पुष्पगुच्छ, शाल व श्रीफळ देऊन सत्कार केला.
कार्यक्रमाचे सूत्रसंचालन अनिल परदेशी यांनी केले, तर मुकुंद आढाव यांनी आभार मानले. कार्यक्रमाच्या यशस्वी आयोजनासाठी विद्यालयातील सर्व शिक्षक व शिक्षकेतर कर्मचाऱ्यांनी विशेष परिश्रम घेतले.
या मार्गदर्शन कार्यक्रमामुळे विद्यार्थ्यांमध्ये सायबर सुरक्षेविषयी जागरूकता, मोबाईलचा सुजाण वापर, महिला सन्मान, व्यसनमुक्त जीवनशैली आणि स्पर्धा परीक्षांविषयी सकारात्मक दृष्टिकोन निर्माण झाला. विद्यार्थ्यांच्या सर्वांगीण विकासासाठी अशा उपक्रमांचे मोठे महत्त्व असून श्री राम-सीता विद्यालय सातत्याने विद्यार्थीहिताचे उपक्रम राबवून आदर्श शैक्षणिक वातावरण निर्माण करत असल्याचे उपस्थितांनी गौरवोद्गार काढले.
