भडगाव(प्रतिनिधी)- भडगाव पंचायत समिती येथे कार्यरत असलेले शाखा अभियंता एन. व्ही.आखाडे यांना पाचोरा पंचायत समिती येथे कार्यरत असताना विविध कामे करताना वरीष्ठाच्या आदेशाकडे दुर्लक्ष करत कामचुकारपणा केला म्हणुन निलंबित करण्यात आले आहे.
निलंबनाचे आदेश मुख्य कार्यकारी आधिकारी पंकज आशिया यांच्या स्वाक्षरीचे असुन हे आदेश कालच भडगाव पंचायत समितीस प्राप्त झाले आहे. भडगाव पंचायत समिती येथे कार्यरत शाखा अभियता. एन.व्ही.आखाडे हे यापुर्वी पाचोरा पंचायत समिती येथे कार्यरत असताना त्यांनी २०१५-१६ मध्ये नगरदेवळा येथे दलित वस्ती सुधार योजने अतर्गत विकास कामे, वडगाव मुलाणे येथे जिल्हा ग्रामीण विकास निधी मधुन कॉक्रीटीकरण करणे, सार्वे प्र.भ.येथे रस्ता काँक्रिटीकरण करणे,नेरी येथे दलीत वस्ती सुधार योजने अंतर्गत विकास कामे पुर्णझालेली असताना या कामाच्या मोजमाप पुस्तिकेत (एम. बी.) नोंदी करीत नसल्याने कामाचे बिले ग्रामपंचायतीस मिळत नसल्याने त्या भागातील जि.प.सदस्य यांनी मुख्य कार्यकारी अधिकारी यांच्या कडे तक्रार केली होती.
सदरची विकास कामे ही पुर्ण झालेली असताना त्या कामाचे मोजमाप होत नसल्याने ग्रामपंचायतीस पुढील विकास कामाचा निधी मिळण्यास अडचण येत होती. विकास कामावर त्याचा परीणाम होत होता. सोपवलेल्या कामकाजात हेतु पुरस्कार दुर्लक्ष करणे, दिलेले कामकाज पुर्ण न करणे, वरीष्ठाच्या आदेशाचे पालन करणे व कर्तव्यात कसुर करणे या कारणामुळे शाखा अभियंता एन. व्ही.आखाडे यांना सेवेतुन निलंबित करण्यात आले आहे. निलंबन काळात शाखा अभियंता एन. व्ही. आखाडे यांचे मुख्यालय हे पारोळा राहणार असुन या कालावधीत मुख्यालय सोडु नये, असे निलबन आदेशात नमुद आहे.हे निलंबनाचे आदेश कालच भडगाव पंचायत समितीस प्राप्त झाले असुन त्यास गट विकास अधिकारी आर.ओ. वाघ यांनी दुजोरा दिला आहे.
