<
जळगाव -(प्रतिनिधी) – ईच्छा देवी चौक ते डी मार्ट या रस्त्याची गेल्या काही वर्षांपासून अत्यंत दयनीय अवस्था झालेली असुन या रस्त्यावर अर्धा फूट ते एक फूटापर्यंत खड्डे पडलेले आहेत . पावसाळा सुरू झाल्याने या रस्त्यावर मोठ्या प्रमाणावर पाणी साचून जणू काही तलावच तयार झालेला आहे . यामुळे नागरिकांचे लहान – मोठे अपघात होत आहेत व अतोनात त्रास होत आहे . त्यामुळे हा रस्ता लवकरात लवकर तयार व्हावा किंवा रस्त्याची किमान दुरुस्ती तरी व्हावी यासाठी व यासर्व प्रकारचा निषेध व्यक्त करण्यासाठी राष्ट्रवादी काँग्रेस पार्टि जळगाव जिल्हा महानगरच्या वतीने साचलेल्या पाण्यात कागदी नाव सोडुन , प्रतिकात्मक मासेमारी करत व खड्यांमध्ये वृक्षारोपण करून अनोख्या पध्दतीने आंदोलन करण्यात आले. सदर आंदोलनादरम्यान रस्तावरची वाहतूक बंद करण्यात आलेली होती.
आंदोलन सुरू असतांना याविषयी जाब विचारण्यासाठी जिल्हा महानगर अध्यक्ष अशोक लाडवंजारी यांनी महानगरपालिका आयुक्त विद्या गायकवाड व सार्वजनिक बांधकाम विभागाचे अभियंता सुभाष राऊत यांच्याशी फोन वर चर्चा केली असता दोघांनीही रस्ता त्यांच्या अधिपत्याखाली येत नाही असे सांगितले , राष्ट्रीय महामार्ग प्राधिकरणच्या अधिकाऱ्यांशी देखील संपर्क करण्याचा प्रयत्न केला असता त्यांनी फोन उचलला नाही . वाहतूक बंद असल्याने याठिकाणी मोठया प्रमाणावर ट्रॅफिक जाम झालेली होती . आंदोलनस्थळी एम आय डी सि पोलिस स्टेशन चे सहाय्यक पोलिस निरीक्षक गिरासे यांनी मध्यस्थी करत आंदोलकांना आंदोलन स्थगित करण्यासाठी विनंती केली व संबंधित अधिकाऱ्यांशी संपर्क करत लवकरच रस्त्याची समस्या मार्गी लावण्यात येईल असे आश्वासन दिल्यावर आंदोलन स्थगित करण्यात आले.
सुमारे एक वर्षापूर्वी या रस्त्याच्या दुरुस्ती साठी महानगरपालिकेच्या वतीने 25 लाखांची निविदा काढण्यात आलेली होती व बिल देखील अदा करण्यात आले . रस्त्याचे थातुरमातुर काम करून बिल पूर्ण काढण्यात आले , यासंदर्भात या प्रभागाच्या नगरसेविका खाटिक यांनी देखील काम न होता बिल काढण्यात आले अशी तक्रार दिलेली होती पण मक्तेदाराच्या प्रेमापोटी व आर्थिक हितसंबंध जोपासत सबंधितांनी या तक्रारीकडे जाणीवपूर्वक दुर्लक्ष केले गेले . याप्रकरणी निष्पक्ष चौकशी करण्यात यावी अशी मागणी राष्ट्रवादी काँग्रेस करत आहे . तसेच याठिकाणी अपघात होऊन नागरिकांना जिवीत हानी झाल्यास याची जबाबदारी कोण घेईल ? रस्ता महानगरपालिकेच्या अखत्यारीत येत नव्हता मग रस्ता दुभाजक व दुरुस्ती महानगरपालिकेच्या वतीने कशी करण्यात आली ? असे सवाल देखील राष्ट्रवादी काँग्रेसच्या वतीने विचारण्यात आले . सदर काम लवकरात लवकर न झाल्यास राष्ट्रवादी काँग्रेस पार्टी जळगाव जिल्हा महानगरच्यावतीने तीव्र आंदोलन करण्यात येईल असा ईशारा देखिल जिल्हा महानगर अध्यक्ष अशोक लाडवंजारी यांनी दिलेला आहे .
सदर आंदोलनात जिल्हा महानगर अध्यक्ष अशोक लाडवंजारी , सरचिटणीस सुनील माळी , युवक अध्यक्ष रिकू चौधरी , दिलीप माहेश्वरी , राजू मोरे , रमेश बहारे , सुहास चौधरी , सुशिल शिंदे , रहीम तडवी , इब्राहिम तडवी सर , अर्षद उर्फ सोनू शेख , वासीम शेख , आरिफ शहा बापू , इरफान बागवान , अकिल बाबा शेख , सत्तार भाई वेल्डिंगवाले , अजीज शेख , इब्राहीम भाई खान , युनूस शहा , कुणाल बागुल , भला तडवी , हितेश जावळे , राजू बाविस्कर , संजय जाधव आदि कार्यकर्ते उपस्थित होते .
