<
मुंबई – (प्रतिनिधी)
शिवसेना हा पक्ष ठाणे शहर आणि जिल्ह्यातील प्रत्येक व्यक्तीच्या मनामनात रुजवणाऱ्या धर्मवीर आनंद दिघे यांचा जीवनपट “धर्मवीर” मुक्काम पोस्ट ठाणे ह्या चित्रपटाद्वारे मांडण्यात आला. १३ मे २०२२ रोजी प्रदर्शित झालेल्या ह्या चित्रपटावर प्रेक्षकांच्या प्रेमाबरोबरच आता पुरस्कारांचाही पाऊस पडत आहे.
ह्या चित्रपटाने “फक्त मराठी सिने सन्मान २०२२” च्या पुरस्कार सोहळ्यात एक नव्हे, दोन नव्हे तर तब्बल सात पुरस्कार पटकावले आहेत. यात प्रविण तरडे यांना सर्वोत्कृष्ट चित्रपट, सर्वोत्कृष्ट लेखन व दिग्दर्शनासाठी तर सर्वोत्कृष्ट अभिनेता हा पुरस्कार प्रसाद ओक यांना मिळाला. याचबरोबर सर्वोत्कृष्ट गीतलेखन मंगेश कांगणे, सर्वोत्कृष्ट गायक आदर्श शिंदे, सर्वोत्कृष्ट रंगभूषा विद्याधर भट्टे यांनाही पुरस्कार प्राप्त झाले आहेत.
या चित्रपटात अभिनेता प्रसाद ओक यांनी धर्मवीर आनंद दिघे यांची भूमिका साकारलेली असून, आतापर्यंत या चित्रपटाने ₹३०.५० कोटींची कमाई केलेली आहे.
