मुंबई -(प्रतिनिधी)- सध्या राज्यात गणेशोत्सवाची धामधूम असली तरी नागरिकांमध्ये विधानसभा निवडणुकीची तारखेची उत्सुकताही तेवढीच आहे. आता लवकरच ही उत्सुकता संपणार आहे, कारण विधानसभा निवडणुकीच्या तारखेची घोषणा गणेशोत्सवानंतर लगेचच होण्याची शक्यता आहे. गणेशोत्सवानंतरच 2014 च्या विधानसभा निवडणुकीची घोषणाही झाली होती.
9 नोव्हेंबर 2019 रोजी सध्याच्या तेराव्या विधानसभेचा कार्यकाळ संपत असल्यामुळे निवडणुकीची सगळी प्रक्रिया त्याआधी पूर्ण करणे निवडणूक आयोगाला बंधनकारक आहे. म्हणूनच 2019 च्या विधानसभा निवडणुकीची घोषणा गणेशोत्सव संपल्यानंतर कधीही होऊ शकते.2014 मध्ये गणेशोत्सवानंतर विधानसभा निवडणुकीची घोषणा होऊन आणि 12 सप्टेंबरपासून आचारसंहिता लागू झाली होती. 15 ऑक्टोबर रोजी मतदान पार पडले होते आणि 19 ऑक्टोबर रोजी निकाल जाहीर झाला होता. यानंतर 31 ऑक्टोबर रोजी सरकारचा शपथविधी झाला होता. त्यामुळे आता कोणत्या तारखेला मतदान आणि मतमोजणी होणार, आचारसंहिता लागू होणार याची उत्सुकता आहे.
यंदा 2 ते 12 सप्टेंबर या कालावधीत राज्यात गणेशोत्सव आहे. 2 सप्टेंबरला गणेश चतुर्थी असून 12 सप्टेंबरला अनंत चतुदर्शी आहे. या दिवशी गणेश विसर्जन झाल्यानंतर दुसऱ्या दिवशी म्हणजे सप्टेंबर महिन्याच्या दुसऱ्याच आठवड्यात विधानसभा निवडणुकीची तारीख जाहीर होण्याची शक्यता आहे.
