<
जळगाव(प्रतिनिधी)- जागतिक आत्महत्या प्रतिबंध दिनानिमीत्‍त निवासी वैद्यकीय अधिकार्‍यांच्या आत्महत्या व घ्यावयाची काळजी या विषयावर एक दिवसीय कार्यशाळा संपन्न झाली.
यावेळी आत्महत्या रोखण्यासाठी विविध विषयावर चर्चा देखिल करण्यात आली. या कार्यक्रमाला प्रसिध्द मानसोपचार तज्ञ डॉ मयुर मुठे यांची प्रमुख उपस्थीती होती तर डॉ. उल्हास पाटील वैद्यकिय महाविद्यालयाचे प्रशासन अधिकारी प्रमोद भिरूड हे देखिल उपस्थीत होते.
कार्यक्रमाच्या सुरूवातीला प्रमुख मान्यवराचे स्वागत पुष्पगूच्छ देउन करण्यात आले. कार्यक्रमाचे प्रास्ताविकात डॉ विलास चव्हाण यांनी जागतिक आत्महत्या प्रतिबंध दिन का साजरा करतो हे विषद करून सांगितले. प्रमुख मान्यवर डॉ. मयुर मुठे यांनी चित्रफित व उदाहरणाचा दाखला देत निवासी वैद्यकिय अधिकार्‍यांच्या आत्महत्या रोखण्यासाठी घ्यावयाची काळजी या विषयावर मार्गदर्शन केले. यात आत्महत्या करणारी व्यक्‍ती कशी ओळखावी व त्या व्यक्‍तीला आत्महत्येपासून कसे परावृत्त करावे याबाबत मार्गदर्शन केले.
उपस्थीतांचे शंका निरसन प्रश्‍नोत्तराच्या माध्यमातून करतांना डॉ मुठे यांनी वैद्यकिय क्षैत्रातील वाढता ताण तसेच आत्महत्या रोखण्यासाठी उपाय योजनावर प्रकाशझोत टाकला. कार्यक्रमाचे सुत्रसंचालन व आभार प्रदर्शन डॉ विलास चव्हाण यांनी केले. कार्यक्रमाला डॉ.उल्हास पाटील वैद्यकिय महाविद्यालयाचे निवासी वैद्यकिय अधिकारी व विद्यार्थी उपस्थीत होते. कार्यक्रमाच्या यशस्वीतेसाठी डॉ. गोविंद यादव, डॉ मुजाहीद शेख यांनी परिश्रम घेतले.
