प्रेमात आकंठ बुडालेल्या मुलीने केले ‘हे’ धक्कादायक कृत्य!

आसाम – (प्रतिनिधी)

असे म्हणतात, ‘प्रेम आणि युद्धात सर्व काही न्याय्य आहे’ प्रेमात काही जण इतके आकंठ बुडालेले असतात की, आपण नेमके काय करत आहोत, याचेही त्यांना भान नसते. आसाम येथे घडलेल्या अशाच एका घटनेत एका प्रेयसीने स्वतःच स्वतःला तिच्या एचआयव्ही पॉझिटिव्ह प्रियकराचे रक्त इंजेक्शनमार्फत टोचून घेतले आहे.

मिळालेल्या माहितीनुसार, आसामच्या सुआलकुची येथे घडलेल्या या घटनेत १५ वर्षीय अल्पवयीन मुलीची ओळख सोशल मीडियाच्या माध्यमातून हाजोच्या सतडोला येथे राहणाऱ्या एका मुलाशी झाली. हळूहळू ओळखीचे रूपांतर मैत्रीत आणि मैत्रीचे रूपांतर प्रेमात झाले. तद्नंतर या मुलीला तिचा प्रियकर एचआयव्ही पॉझिटिव्ह असल्याचे कळाले.

यानंतर मुलीच्या पालकांना तिच्या प्रेमसंबंधाची व तिचा प्रियकर एचआयव्ही पॉझिटिव्ह असल्याची कुणकुण लागताच मुलीच्या पालकांनी तिच्या प्रेमप्रकरणाला विरोध करीत प्रियकराला न भेटण्याची सक्त ताकीद दिली.

तरीही प्रेमात आकंठ बुडालेली ही अल्पवयीन मुलगी बऱ्याच वेळा तिच्या प्रियकराला भेटली. एवढेच नव्हे तर तिने त्याच्यासोबत पळून जाण्याचाही प्रयत्न केला, परंतु प्रत्येक वेळी मुलीचे पालक मुलीला स्वतःहुन परत घेऊन आले.

यानंतर या मुलीने टोकाचे पाऊल उचलत इंजेक्शनमार्फत तिच्या एचआयव्ही पॉझिटिव्ह प्रियकराचे रक्त सुईमार्फत स्वतःला टोचून घेतले, जेणेकरून दोघांना कोणीही एकमेकांपासून वेगळे करू शकणार नाही.

दरम्यान, मुलीचे हे भयानक कृत्य तिच्या पालकांना समजताच त्यांच्या पायाखालची जमीनच सरकली. त्यांनी तात्काळ पोलिसांना या घटनेची माहिती दिली असून, या प्रकरणात पोलिसांनी मुलीच्या प्रियकराला अटक केली व मुलीला डॉक्टरांच्या देखरेखीखाली ठेवले आहे.