भारतीय सैन्यदलात हंगामी पद्धतीने जवानांची भरती करण्याच्या अग्निपथ योजनेबाबत वाद कायम असताना, केंद्र सरकारने या अग्निवीरांसाठी आणखी एक सवलत जाहीर केली आहे. त्यानुसार सेवाकाळात जखमी झालेल्या अग्निवीरांना 23 व्या वर्षानंतर सैन्यदलांतून सेवामुक्त झाल्यावरही मोफत उपचार करण्याचा प्रस्ताव आहे.
योजनेला झालेला विरोध पाहता केंद्र सरकारने टप्प्याटप्प्याने दिलासा देण्याचे सत्र सुरू केले आहे. निमलष्करी दल व राज्यांच्या पोलिस दलांमध्ये 75 टक्के सेवामुक्त अग्निवीरांना राखीव जागा ठेवण्याच्या घोषणा टप्प्याटप्याने करण्यात आल्या.
या पृष्ठभूमीवर संरक्षण मंत्रालयाकडून अग्निवीरांसाठी एका नवीन सवलतीची घोषणा आज सोमवारी करण्यात आली. त्यानुसार सेवाकाळात जखमी झालेल्या व दीर्घ उपचारांची गरज असलेल्या अग्निवीरांना सेवामुक्त केल्यावरही मोफत उपचारांची सुविधा कायम ठेवण्यात येणार आहे. योग्यता व कामगिरीच्या आधारावर लष्करी सेवेतून चार वर्षांनी मुक्त केले जाणार्‍या या 75 टक्के तरुणांना जे 11.71 लाख रुपयांचे सेवा निधी पॅकेज मिळणार आहे.
त्याच्या व्यतिरिक्त हे मोफत उपचार असतील.संबंधित अग्निवीर गंभीर जखमी झाले असतील व त्यांना दीर्घ उपचारांची गरज असेल त्यांच्यावर त्या कालावधीत लष्कराच्या नियमांनुसार सैन्यदलांच्या रुग्णालयांत उपचार करण्यात येतील. सेवाकाळात गंभीर जखमी झाल्यास 15 लाखांपासून 44 लाखांपर्यंत भरपाई देण्याची तरतूद मूळ योजनेत यापूर्वीच करण्यात आली आहे.
